Gibutangan nalang karon og kandila sa mga residente ang luna kung diin nakaplagan ang ulo sa usa ka bata nga gilangaw na, diin sa karon, nagpahigayon og lawom nga imbestigasyon ang kapulisan human napalgan ang ulo sa usa ka masuso sa Purok 10, Lubas 1, Brgy. Camp 7, Minglanilla, Cebu, niadtong Enero 5, 2026, sa alas 2:30 sa hapon.
Ang maong makalilisang nga panghitabo nakit-an ni Judy Enriquez Obcial, 54-anyos ug lumulupyo sa maong dapit, ug sa gikabutyag niya atol sa ekslusibong pakighinabi sa Bombo Radyo Cebu Newsteam kaniya, samtang naglakaw siya sa dalan ubos sa iyang balay, iyang namatikdan ang usa ka itoy nga dunay gidala nga gitoohang ulo sa bag-ong himugso nga bata, mao nga dali kining nipahibalo sa mga opisyal sa barangay.
Napalgan ang maong parte sa lawas daplin sa kalsada sa barangay, ug nagtoo ang mga otoridad nga ang masuso gibiyaan lang sa maong dapit sa wala pa mailhing suspisado.
Agi’g panawagan usab ni Obcial sa ginikanan sa bata, siya nanghinaot nga unta, gi amoma kini og tarung ug wala pasipad-e.
Sa pagkakaron, nipahigayon og search operation ang mga imbestigador (IOC) uban ang mga residente sa palibot aron pangitaon ang lawas sa bata, ug sa gilay-on nga 50 metros gikan sa dapit diin nakit-an ang ulo, napalgan ang inahan sa maong itoy, nga dunay mantsa sa dugo sa yuta, ingon man sa ulo ug baba sa iro.
Ingun man nga padayon pa ang paningkamot sa kapulisan usab aron mailhan ang ginikanan sa bata, ingun man nga gisusi na usab sa IOC ang mga CCTV footage sa palibot aron mailhan ang mga “persons of interest” nga nakit-an sa lugar sa wala pa mahitabo ang insidente.
