Nipasalig ang United Nations nga andam ang pundo alang sa mga mag-uuma ug mangingisda nga maapektuhan sa pagkusokuso sa Super Typhoon Pepito.
Gani gi-activate sa United Nations – Food and Agriculture Organization (FAO) Anticipatory Action (AA) mechanism niini sa Catanduanes ug Northern Samar.
Diin ang AA usa sa mga modernong sistema nga gigamit sa UN sa pagtubag sa mga katalagman ug paghatag og gahum sa mga residente nga direktang naapektuhan sa mga katalagman.
Matod pa sa UN, adunay pundo nga gigahin aron matabangan ang mga mangingisda ug mag-uuma nga maapektuhan sa paghapak sa bagyo.
Apil niini ang 2,813 ka mag-uuma ug mangingisda gikan sa probinsiya sa Catanduanes ug 3,610 ka mag-uuma ug mangingisda gikan sa Northern Samar.
Ingon man nga ang matag benepisyaryo gilauman nga makadawat og P3,300 nga cash matag usa.
Ang pondo gikan sa German Federal Foreign Office gipaagi sa FAO Special Fund for Emergency and Rehabilitation Activities (SFERA).
Pipila sa mga butang nga gikonsiderar sa pag-activate sa AA mao ang kung ang kusog sa bagyo moabot sa 89kph, adunay taas nga hulga sa pagdahili sa yuta ug pagbaha, ug ang Red Alert level gipataas sulod sa 200km diameter gikan sa sentro sa bagyo.//
