CEBU CITY-Malinawon ug hapsay ra ang pag sugod sa pagpangampanya sa mga kandidato sa Barangay ug Sanguniang Kabataan Election nga matapos sa Octobre 28, 2023.
Matod ni Police Lieutenant Colonel Gerard Ace Pelare ang spokesperson ni Police Brigadier General Anthony Aberin hepe sa Police Regional Office 7 nga wala sila maka monitor o makadawat og report nga dunay problema sa mga kandidato.
Nakita nila nga misunod ang tanang kandidato sa lagda sa Commission on Election nga tungod niini ang kapulisan nanghinaot nga hangtod sa pagtapos sa piniliay malinawon ug hapsay ra ang Central Visayas.
Apan giklaro ni Pelare nga dili na manginlabot ang kapulisan sa pag baklas sa mga campaign posters kung kini nakalapas man sa lagda sa Comelec sanglit ang ilang trabaho mao ra ang pagpatuman sa kahusay ug kalinaw sa piniliay.
Samtang nakuhaan ang 41 ka mga barangay nga unang ipaubos sa areas of concern ug areas of immediate concern kini human sa final evaluation sa Regional Joint Security and Control Center.
Matod ni Pelare nga moabot nalang sa 18 ang areas of immediate concern ug unom ang areas of concern.
Ang 18 nga gipaubos sa areas of immediate concern kasagaran niini naa nahimutang sa Negros Oriental ug Bohol tungod sa presensya sa Communist Terrorist Group kun CTG.
Pasabot ni Pelare nga nagpadayon ang ilang gihimo nga threat assessment niadtong mga dapit nga unang giila nga bantayanan base sa nahitabo sa milabay nga piniliay apan karon nasuta nga wala nay hulga sa kagubot.
