CEBU CITY-Nakasulod na sa dakbayan sa Sugbo ang African Swine Fever (ASF) kansang unang na-detect sa dakbayan sa Carcar sa probinsiya sa Sugbo.
Gikumpirmar ni Dr. Jessica Maribojoc, ang head sa Cebu City Department of Veterinary Medicine and Fisheries (DVMF), nga aduna na’y unang kaso sa ASF sa dakbayan.
Apan gitino niini nga dili kini gikan sa ihawan o alang sa negosyo, inay na-detect kini sa usa ka compound kung diin adunay pamilya nga nagbuhi ug baboy alang sa ilahang personal consumption, panahon nga aduna kini sila’y okasyon kay ilahang ihawon.
Matud pa, ang maong baboy kay gi-deliver usab gikan sa probinsiya sa Sugbo.
Gidugang ni Dr. Maribojoc nga kini pa lang ang nag-inusara nga lugar sa dakbayan nga adunay nagpositibo sa ASF hinungdan nga nagpadayon usab ang ilahang monitoring, ingon man ang pagpahigayon ug mga coordination meeting sa nagkadaiyang stakeholders.
Hinuon, giklaro niini nga sa ilahang gipahigayon nga blood testing sa mga baboy sulod sa 500 meters gikan sa area nga na-detect ang ASF, giingong usa lang ang nakita-an sa maong sakit ug ang uban kay nag-negatibo man sa African Swine Fever.
Sa pagkakarun, nagpaabot na lang sila deklarasyon sa Bureau of Animal Industry kung ibutang ba sa red zone ang dakbayan, butang nga giingong wala na sila’y mahimo niini.
