CEBU CITY-Ipahigayon sa dakbayan sa Sugbo ang Professional Regulation Commission-computer based licensure examination gikan sa systema nga papel og ballpen nga mga pamaagi.
Mao kini ang gipaambit ni Narcival Z. Taquiqui, ang Regional Director sa PRC VII diin gilauman nga mahitabo kini sa unang quarter sa sunod tuig.
Ang CBLE kay usa ka bag-ong modern nga pamaagi sa pagkuha sa eksaminasyon sa lisensya sa nasud nga mogamit sa teknolohiya gikan sa naandan nga tradisyonal nga papel ug lapis ug nagtumong sa pagpalambo sa digital system alang sa mga nagtinguha nga propesyonal.
Ingon man nga ang pagpatuman sa CBLE kay makapadali sa pagproseso sa mga resulta ug pagsiguro sa integridad sa eksaminasyon pinaagi sa mga advanced security measures.
Subay niini, mipasalig si RD Taquiqui nga ang pagbalhin sa bag-ong sistema kay dili makaapekto sa mga board examinees.
Sa laing bahin, ang ilang buhatan nakapahigayon usab og kinatibuk-ang 42 nga mobile services ug nakaserbisyo sa kapin 7,000 ka PRC-related transactions gawas sa Cebu City.
Naghimo usab sila og kinatibuk-ang 101 ka monitoring ug inspeksyon sa nagkalain-laing mga establisemento aron sutaon ang pagtanyag sa mga board courses sa mga lisensyadong propesyonal ug institusyon sa edukasyon.
Tumong usab sa ahensya nga mag-abli ug daghang satellite service centers sa rehiyon aron makahimamat og daghang kliyente, hilabi na sa mga hilit nga lugar.
