Gikuwestiyon sa mga prosecutor gikan sa House of Representatives ang testimonya sa unang saksi sa depensa alang kang Bise Presidente Sara Duterte atol sa impeachment trial, human naghatag ang saksi og mga tubag nga dili makanunayon ug dili klaro mahitungod sa deklarasyon sa mga kabtangan sa Bise Presidente.
Matod ni Manila 3rd District Representative Joel Chua, ang testimonya ni Davao City Assessor Engineer Jaime Adalin—imbis nga makatabang sa depensa—nahimo hinuong kahuyang sa ilang kaso.
Partikular nga gikuwestiyon sa mga prosecutor ang kalainan tali sa presyo nga unom ka milyon ka pesos nga gibaligya niini, sumala sa nakalatid sa electronic Certificate Authorizing Registration (eCAR), ug sa kantidad nga napalit kini nga napulo ka milyon ka pesos, nga natala sa 2024 Statement of Assets, Liabilities, and Net Worth (SALN) ni Duterte.
Gikuwestiyon usab si Adalin mahitungod sa iyang dayag nga pagduhaduha sa pag-ila sa propiedad nga makita sa mga litrato nga gipresentar.
Matud usab ni House prosecution spokesperson ug Lanao del Sur Representative Zia Alonto Adiong nga ang mga tubag sa saksi dili makanunayon ug napakyas sa pagpasabot og klaro sa mga kalainan nga nakita diha sa mga dokumento.
Hinuon, gipasabot ni Adalin nga ang klasipikasyon sa usa ka propiedad nagdepende sa aktuwal nga paggamit niini, nga matino human sa usa ka inspeksyon.
Ang maong testimonya kabahin sa presentasyon sa depensa may kalabotan sa nahabilin nga Article II impeachment charge batok kang Duterte, nga naghisgot mahitungod sa giingong bahandi nga wala mahatagi og katin-awan.
