CEBU – Gihandum karung adlawa ang unang anibersaryo sa gitawag nga ‘killer landslide’ sa Sugbo.
Gipangulohan sa lokal nga kagamhanan sa Naga ang gipahigayun nga misa kung diin gitambungan kini sa mga lokal nga opisyal sa dakbayan ug sa mga pamilya sa mga namatay.
Pagkahuman usab sa misa, pipila ka mga pamilya sa mga landslide victims ang nagpahigayun ug pagsalo-salo isip paghandum sa ilahang mga mitaliwan nga kabanay.
Sa pakighinabi sa Bombo Radyo Cebu kang Reyna Alberto, gibutyag niini nga susamang gikauban sa gihapun nila ang duha niini ka mga pag-umangkon nga sila si Bianca ug Michael Versales gumikan kay sakit sa ilahang bu-ut kung hunahunaun nga patay na ang duha.
Matud pa nga magpabilin sa ilahang kasingkasing ug panumdoman ang mao niini nga mga pag-umangkon.
Sila si Bianca ug Michael Versales ang lakip sa mga casualty kung diin na-ugkat sa mga rescuer ang patay nga lawas sa duha nga giingung gigakus pa ni Bianca ang iyahang igsu-un nga si Michael.
Kahinumduman nga Setyembre 20 sa nakalabay nga tuig, pasado alas 5 sa buntag, namukaw ang nagdahunog nga yuta sa mga taga Sitio Sindulan, Barangay Tinaan, dakbayan sa Naga kung diin mikalas sa kinabuhi sa 76 ka mga tawu ug unom ang missing. (SBR)
