Nabalaka ang United Nations sa grabeng kadaot ug epekto sa mga tawo sa Lebanon sa nagpadayon nga mga pag-atake sa Israel.
Sumala sa United Nations Refugee Agency (UNHCR), tungod sa gipalapdan ug gipakusog nga mga pag-atake sa Israel, daghang mga sibilyan ang nawad-an og pinuy-anan.
Kapin sa 1.2 milyon nga mga tawo ang napugos sa pagbiya sa ilang mga panimalay sukad giatake sa Israel ang Lebanon.
Gidugang niini, nga samtang nanglabay ang mga adlaw, ang gidaghanon sa mga residente nga gipabakwit nagpadayon sa pagdaghan.
Kuwang usab ang mga temporaryo nga puy-anan alang sa mga gipabakwit tungod sa kagubot.
Kahinumduman nga gipakusog sa Israel ang mga pag-atake niini sa Lebanon human ang mga militante sa Hezbollah naglunsad og mga missile gikan sa Lebanon kauban sa hiniusa nga pag-atake sa Israel ug US sa Iran.
