CEBU CITY- Nagpahigayon ug prayer rally ang mga Duterte supporters sa Plaza Independencia, Sugbo kagahapong adlaw sa Dominggo, Hulyo 19 aron ipanawagan ang pagpabalik sa imbestigasyon sa flood control scandal ug pagpanubag sa mga nalambigit nga opisyal niini
Gipangunayan ang mao nga prayer rally sa United People’s Initiative (UPI) ug gikalambigitan sa mga nagkalain-lain nga personalidad ug mga grupo nga nagasuporta kang Vice President Sara Duterte.
Gipanawagan sa maong grupo ang pagpadayon sa imbestigasyon ug pagpanubag sa mga nalambigit sa kurapsyon sa flood control anomalies ug pagpahunong sa paggukod sa mga Senador nga kaalyado sa mga Duterte.
Matud pa ni Jun Abines, Convenor sa Cebu Alliance for Duterte (CAD) ug usa sa mga misalmot sa maong kalihukan, ang maong malinawo nga prayer rally nagpadayag sa kagustohan sa kadaghanan nga mapadayon ang imbestigasyon sa anomalya sa flood control ug paglikay sa distraction aron sa pagtabon sa isyu.
Gihimug-atan ni Abines nga gikinahanglan hatagan ug importansya ang accountability sa gobyerno ug tumanon sa administrasyong Marcos ang ilang saad nga mapanubag ug madakpan ang mga nalimbigit nga mga opisyal sa maong anomalya.
Sigon niini sukwahi ang gibuhat sa kagamhanan, inay mas giuna ang pagpangdaot matud pa kang Vice President Sara Duterte, maylabot sa confidential ug Intelligence funds niini kumpara sa mga trilyones nga pagpangawkaw sa Infrastructure projects.
Kahinumdoman, laing grupo usab sa United People’s Initiative ang nagpahigayon og panagtapok sa kaulohan sa susamang adlaw.
