CEBU CITY-Nadungagan og unom ka mga barangay sa Sugbo ang gideklarar nga drug cleared human sa nahitabong pagtuki sa Regional Oversight Committee on Barangay Drug Clearing.
Diin ang unom ka mga barangay mao ang Bacayan, Guba, Malubog, Pit-os, Paril ug Taptap.
Tungod niini, anaa na sa 32 sa 80 ka mga barangay sa dakbayan ang matawag nga “drug-cleared” nga nagpasabot nga nahuman na ang unom ka buwan nga gipailalom sa Community-based Drug Rehabilitation Program ang mga drug personalities sa barangay nga anaa sa Philippine National Police (PNP)-Philippine Drug Enforcement watchlist.
Nipadayag si Acting Mayor Raymond Alvin Garcia nga ang kagamhanan sa dakbayan sa Sugbo andam gayud nga mopaluyo sa pagpakigbatok kontra sa drugas.
Nimando usab si Garcia kang Jonah John Rodriguez, ang executive director sa Cebu City Office for Substance Abuse Prevention (COSAP), nga lihokon ang cash incentive nga P100,000 alang sa kada usa sa unom ka mga barangay.
Samtang gihatagan og katin-awan ni Rodriguez nga ang pagdeklarar og drug cleared sa barangay kay wala nagpasabot nga wala na’y drugas ug padayon ang ilang monitoring arun hingpit na kini nga mawala ug dili na makapanikad sa maong dapit.(Cebu City PIO)
