-- ADVERTISEMENT --
CEBU CITY — Mabalaka ang mga indibidwal karon ning gi-atubang karon nga krisis sa nasud nga dala sa makamatay nga COVID-19 pandemic.
Matud ni Dr. Anne Oaminal Watin, usa ka medical psychologist, nga makasinati og kabalaka o anxiety ang usa ka tawo ilabi na nga dili pa matubag kung kanus-a ba mahuman ang maong pandemic nga sakit.
Atol sa tulumanong Doktor Bombo, mihatag si Dr. Watin og pipila ka mga butang nga angayang pagabuhaton aron mamentenar ang maayong panghunahuna bisan pa man og gipaubos sa home quarantine:
- Mangita og kaistorya. Samtang gipaubos ang pipila ka mga lugar sa enhanced community quarantine, mao kini ang panahon aron mag-reconnect o makig-bonding kauban ang pamilya sa bisan unsa man nga buluhaton sa balay.
- Buhaton gihapon ang mga naandang butang sa balay. Bisan og na-boring na tungod sa kamingaw, importante kaayo aron pagabuhaton ang mga naandang routine matag adlaw sama sa paghinlo ug uban pa.
- Pagbaton og schedule kung kanus-a mag-check sa mga balita mahitungod sa COVID-19. Gibutyag ni Watin nga moresulta sa negatibong panghunahuna kung masobrahan sa pag-check sa internet o sa mass media kalabot na sa maong sakit. Dugang pa niini nga apektado ang mga buluhaton kung napuno sa negativity ang utok.
- Importanteng imentenar ang maayong panglawas pinaagi sa inadlaw-adlaw nga ehersisyo.
Kung sundon kining mga butang, mamentenar nato ang maayong panghunahuna ug magpabilin ang paglaum nga makalingkawas ang nasud sa COVID-19.
