CEBU CITY – Walo ang nasikup sa gipahigayun nga entrapment operation sa NBI-Central Eastern Visayas Regional Office (CEVRO) sa usa ka dakung mall sa South Road Properties (SRP), dakbayan sa Sugbo.
Unum sa mga dinakpan ang pulus mga empleyado sa Land Transportation Office (LTO 7) nga mao sila si Dembert Dasig, Gladys Mendero, Charish Mae Cabigon, Epifanio Callino, Jr., Jonathan Magudato, ug Marilyn Erederos, samtang lain pang duha nga sila si Fredlyn De Lara ug Dexter Capendit.
Gipadayag ni LTO 7 Regional Director Victor ‘Vic’ Caindec nga gikasagmuyu niini ang maong pagkalambigit sa iyahang mga empleyado sa korapsyon ug dili niini tugutan nga magpadayun ang maong matang sa kalihukan sa iyahang buhatan.
Matud ni Caindec nga bugtung ang NBI lang ang ahensya ang magpahigayun ug operasyon kung diin adunay pakig-alayun sa iyahang opisina nga siya lang ang bugtung usab ang nasayud.
Sigon pa nga tuyu kini sa ilahang national office arun sa paghatag ug tubag sa daghang mga reklamu sa LTO gumikan sa mga giingung fixer nga adunay mga koneksyon nga regular employees sa buhatan.
Subay niini, subling gipahimangnu-an ni Caindec ang mga empleyado sa LTO nga hunungun ug dili na gayud makiglambigit niining mga fixer.
Samtang, awhag niini sa publiko nga dili mugamit ug fixer ug musunud na lang sa insaktu nga proseso.
