CEBU CITY- Gikustodiya na sa kapolisan ang upat (4) ka suspetsado nga giilang responsable sa pagpatay ug paglubong sa ilang kauban sa trabaho sa usa ka manokan nga nahimutang sa Barangay Pung-ol Sibugay,Cebu City samtang usa pa ka suspek ang padayon pang gipangita.
Ang insidente nahitabo human mapalgang patay si Jovani Bonghanoy, usa sa mga trabahante sa manokan, nga adunay samad laslas sa liog, nga gilubong sa usa ka mabaw nga lubnganan sa bahin sa umahan.
Nakit-an ang iyang lawas pagkahuman gi-report sa iyang pamilya nga nawala siya sukad Agosto 24 ug gisugdan ang pagpangita niini.
Sumala ni Police Lieutenant Colonel Maria Theresa Macatangay, deputy city director for operations and information officer sa Cebu City Police Office, nadakpan ang mga suspetsado human sila makadawat og impormasyon kabahin sa lawas nga gilubong sa sulod sa compound sa manokan diin nagtrabaho ang biktima ug ang mga suspetsado.//
Sa inisyal nga imbestigasyon, napamatud-an nga adunay mainit nga panaglalis nga misangpot sa pagpatay sa biktima.
Gituohan usab nga nagtinabangay ang grupo sa paglubong sa lawas aron tabunan ang krimen.
Narekober ang lawas sa biktima niadtong Agosto 27, ug ginahimo na karon ang autopsy aron masuta ang hinungdan sa kamatayon.
Gikumpirma sa Cebu City Police Office (CCPO) nga pasakahan og kasong murder ug obstruction of justice ang mga suspetsado.
Nagpadayon ang imbestigasyon aron masuta ang motibo sa krimen ug kung aduna pa bay laing nalambigit niini.
