CEBU – Upat ka mga kompanya nga gituhu-ang nagpadagan ug iligal nga investment ang gi-monitor karun sa Police Regional Office (PRO) 7 lukup Central Visayas.
Kini ang gitug-an ni PRO 7 Regional Director Brigadier General Debold Sinas, apan giingung dili na una kini nganlan sa pagkakarun.
Gipahibalu ni Brig. General Sinas nga ilaha kini karun nga gisundan ug magpulung pa sila kabahin niini kauban ang kadagkuan sa National Bureau of Investigation (NBI 7).
Matud pa nga dili mu menus 10,000 katawu na ang naka-invest sa mga iligal nga investment ug gani taas pa ang ihap apan giingung dili pa kini ang ilahang actual nga pag-estimate.
Gipahibalu usab sa director nga tulu ka mga opisina nga nagpadagan ug ‘pyramiding scheme’ ang ilahang gi-raid kauban ang NBI, CIDG ug Anti-Cybercrime Group kagahapung adlawa.
Gilangkuban kini sa ADA Farms Agriculture kung diin nakakuha ang mga operatiba ug upat ka mga computer, mga dokumento ug uban pang mga ebidensya, ikaduha mao ang Organico Agriventures Inc., sa Barangay Mabolo dakbayan sa Sugbo kung diin nakuha-an ug 167 ka mga computer ug mga dokumento, ug ikatulu mao ang Business venture sa Tagbilaran, Bohol kung diin walay nakuha ang mga operatiba gumikan kay limpyu na ang opisina nga susamang gi-abandonar na ang ilahang opisina.
Samtang, gikumpirmar usab ni Sinas nga nakasulud na ang Kabus Padatoon (KAPA) sa probinsiya sa Bohol, ingun man sa Negros island.
