MANDAUE CITY, CEBU-Gitangtang ang upat ka traffic enforcers sa Mandaue City sa ilang trabaho tungod sa mga isyu sa misconduct.
Gibutyag ni Edwin Jumao-as, executive director sa Traffic Enforcement Agency of Mandaue (TEAM), nga ang upat ka mga traffic enforcer gitaktak human napamatud-ang sad-an sa nagkadaiyang reklamo batok kanila nga nitumaw sa ilang buhatan diin mihimo og imbestigasyon ang division head ug didto napamatud-an nga sad-an ug gi-terminate niadtong Mayo.
Giklaro ni Jumao-as nga dili nila i-tolerate ang sayop nga binuhatan sa ilang mga personnel sa pagkakaron nagpahigayon sila og re-orientation sa ilang field personnel kon unsaon pagdakop ug pagdumala sa mga traffic violators.
Tungod niini pito na ka personnel ang gi-hire nga hulip sa mga natanggong nga traffic enforcers ug pun-on ang posisyon niadtong ni-resign aron mangita og maayong opurtunidad ang bag-ong mga kawani nagsugod sa trabaho niadtong Martes, Hunyo 20.
Niadtong tuig 2022, lima ka mga kawani usab ang gi-terminate. Tulo ang gitaktak tungod sa misconduct samtang ang laing duha ka personnel wala na mobalik sa trabaho human nagdumili sa pagpa-drug test niadtong 2021, upat usab ka personnel ang gi-dismiss tungod sa lain-laing reklamo.
Gitino ni Jumao-as nga si bisan kinsa mahimong mopasaka og reklamo batok ni bisan kinsang personahe sa TEAM, nga iyang gituohang nakahimo og sayop, sa buhatan sa TEAM nga nahimutang sulod sa Mandaue City Cultural and Sports Complex compound.
