CEBU CITY — Upat ang nasikop human nakuhaan og kapin pito ka milyon ka pesos nga kantidad sa ginadiling drugas atol sa gipahigayong mga buybust operation sa dakbayan sa Sugbo ug Talisay.
Nadakpan ang usa ka high-value target human nakuhaan og 7.4 million pesos nga balor sa shabu sa Sitio Sto. Niño, Barangay Mambaling, dakbayan sa Sugbo.
Giila ang bigtime drug dealer nga si Arnel Salapa Estor, 34 anyos, ug residente sa Sitio Puntod, sa nahisgutang barangay.
Matud sa hepe sa Labangon Police Station nga si Police Major Henrix Bancoleta, nga gipaubos sa surveillance ang maong dinakpan sulod sa usa ka semana.
Nakuhaan ang drug dealer og kapin usa ka kilo nga shabu, usa ka cellphone, ug 1,000 pesos isip buybust money.
Natanggong ang dinakpan sa lock up cell sa Labangon Police Station.
Samtang nabalhog sa prisuhan ang laing tulo ka mga dinakpan human nakuhaan og linibo ka pesos nga kantidad sa drugas sa Barangay Lawaan 3, dakbayan sa Talisay.
Nasikop ang subject nga si Isidro Petiluna, ang kapuyo niyang si Maria Empacis, ug ang gituohang kakonsabo nga si Michael Dave Batarilan.
Narekober sa mga sakop sa Talisay City PNP ang mga pinaketeng shabu nga nagkantidad og 136,000 pesos.
Mag-atubang ang mga dinakpan og kasong kalapasan sa Comprehensive Dangerous Drugs Act.
