Giinsister ni Senador Christopher “Bong” Go nga ang mga trabahanteng Pilipino ang angay nga mobati sa pagtubo sa ekonomiya sa nasud human opisyal nga giila sa World Bank ang Pilipinas isip usa ka upper-middle-income nga nasud.
Sumala ni Go, daw ironic nga bisan pa sa pag-ila sa World Bank sa pag-uswag sa ekonomiya sa nasud, kapin sa katunga sa mga pamilyang Pilipino o dul-an 14.5 milyon nga mga pamilya ang giisip gihapon nga kabus basi sa mga pagtuon nga gihimo.
Tungod niini, gipasalig sa senador nga kini nga pag-ila kinahanglan nga moresulta sa pag-abli sa daghang mga trabaho, husto ug patas nga sweldo aron ang mga pamilyang Pilipino makatubag sa ilang adlaw-adlaw nga panginahanglan.
Gipasiugda usab niya ang kasamtangang kalisud nga giantos sa mga minimum wage earners tungod sa pagsaka sa gasto sa panginabuhi nga gipahinabo sa pagsaka sa presyo sa mga produkto sa petrolyo.
Niining bahina, gikondenar pag-usab ni Go ang Temporary Restraining Order (TRO) nga gi-isyu sa Pasig City Regional Trial Court batok sa giaprobahan nga P85 nga inadlaw nga pagtaas sa sweldo sa mga trabahante sa Metro Manila.
Nanawagan ang senador sa korte nga ikonsiderar ang Artikulo 126 sa Labor Code nga nag-ingon nga walay korte, tribunal o bisan unsang ahensya ang maka-isyu og TRO batok sa proseso sa National Wages and Productivity Commission (NWPC) ug Regional Tripartite Wages and Productivity Boards (RTWPB).
Gipunting usab ni Go nga ang P85 nga pagtaas sa sweldo mas ubos kaysa sa iyang gisugyot nga P100 nga pagtaas sa sweldo para sa mga Pilipinong trabahante, dili lang sa Metro Manila apan sa tanang rehiyon sa nasud, samtang nanawagan sa Kongreso nga ipasar ang nahisgutang balaodnon.
