Subling gibabagan na usab sa Estados Unidos ang usa ka draft nga resolusyon sa United Nations Security Council nga nanawagan alang sa usa ka dinalian ug permanenteng ceasefire sa Gaza ug ang pagpagawas sa mga binilanggo niini.
Kini ang ikaunom nga higayon nga gibabagan sa Estados Unidos ang nahisgutang lakang, diin, matod pa ni US deputy Middle East envoy Morgan Ortagus, dili na ikatingala ang pagsupak sa US sa resolusyon.
Kini tungod kay ang resolusyon giingong napakyas sa pagkondena sa Hamas o pag-ila sa katungod sa Israel sa pagpanalipod sa kaugalingon ug sa sayop nga pag-legitimize sa mga bakak nga asoy nga makabenepisyo sa Hamas.
Gipadayag dayon sa mga miyembro sa UN ang ilang kasagmuyo sa lakang sa US.
Subay niini, ang tanan nga 14 sa ubang mga miyembro sa Security Council niboto pabor sa draft nga resolusyon, nga naghulagway sa sitwasyon sa Gaza isip usa ka katalagman ug nanawagan sa Israel nga tangtangon ang tanan nga mga pagdili sa tabang.
Nihimo usab ang konseho sa lakang taliwala sa mga pasidaan gikan sa United Nations humanitarian office nga ang katapusang mga lifeline sa Gaza City nahutdan samtang ang Israel nagpadayon sa iyang opensiba.
Samtang, ang bag-ong boto sa UN moabut mga adlaw sa wala pa magtigum ang mga lider sa kalibutan alang sa UN General Assembly diin ang Gaza mao ang panguna nga hilisgutan ug ang panguna nga mga kaalyado sa US lakip ang UK gilauman nga ilhon ang estado sa Palestinian nga independente.
