Gikumpirmar sa militar sa US nga ilang giguba ang 4 ka drones ug 2 ka anti-ship ballistic missiles sa mga rehiyon sa Yemen nga kontrolado sa mga rebeldeng Houthi nga gipaluyohan sa Iran.
Ang mga airstrikes nga gilunsad sa US nahitabo taliwala sa nagpadayon nga pag-atake sa mga Houthi sa mga barko nga giingon sa rebelde nga grupo nga nalambigit sa Israel, labi na ang mga naglawig sa Red Sea ug Aden Gulf sukad kaniadtong Nobyembre sa miaging tuig.
Gikatahong ang aksyon sa mga rebeldeng Houthi nakighiusa sa ilang kaalyado nga Hamas nga nag-atubang sa opensiba sa Israel sa Gaza strip.
Samtang, malampuson usab nga giguba sa mga pwersa sa US Central Command (USCENTCOM) ang 4 ka Unmanned Aircraft Systems (UAS) ug 2 ka Anti-Ship Ballistic Missiles (ASBM) sa mga lugar nga kontrolado sa Houthi sa Yemen.
Gi-intercept usab sa mga pwersa sa Amerika ang unmanned aircraft system nga gilusad gikan sa Houthi-controlled area sa Bab al-Mandab Strait ug nakadaot usab sa patrol boat sa mga rebeldeng Houthi.
Bisan pa sa paglunsad sa Houthis og 4 ka anti-ship ballistic missiles ngadto sa Red Sea sa milabay nga 24 ka oras, ang komand sa militar sa US miingon nga walay mga kadaot nga gitaho.
