Gipanghimakak sa US Navy ang pangangkon sa China nga nipagawas kini og pasidaan ug gipapahawa ang guided missile destroyer nga USS Higgins samtang nagpahigayon og misyon sa Panatag Shoal (Scarborough Shoal).
Gihimo sa US Navy ang pagkaro human giluwat ni Senior Captain He Tiecheng sa People’s Liberation Army Southern Theater Command nga ilang gipalihok ang ilang Chinese military aron sa pagmonitor, pag-isyu og mga pasidaan ug paglayas sa USS Higgins.
Apan, sumala sa US 7th Fleet Commander Megan Greene, ang pamahayag sa China dili tinuod.
Matod usab niya nga walay dili maayong insidente nga nahitabo samtang ang barko sa Amerika anaa sa tunga-tunga sa misyon niadtong Agosto 13.
Giklaro usab sa opisyal sa US Navy nga ang USS Higgins nagpahigayon lamang og kagawasan sa mga operasyon sa nabigasyon subay sa internasyonal nga balaod ug nagpadayon sa pagpahigayon sa mga normal nga operasyon niini, ug sa dihang nahuman na, mibiya kini sa lugar.
Unang nasiplatan ang barko sa US sa nahisgutang kadagatan duha ka adlaw human sa panagbangga sa duha ka barko sa China sa maong lugar niadtong Lunes, Agosto 11 samtang naggukod sa barko sa Philippine Coast Guard (PCG) nga BRP Suluan.
Gawas sa USS Higgins, nakita usab ang littoral combat ship nga USS Cincinnati nga nagpahigayon og freedom of navigation operation sa gilay-on nga 30 nautical miles gikan sa shoal.
