Naglaum ang gobyerno sa US nga ang mga agresibong aksyon sa West Philippine Sea kay muminos.
Kini nunot sa panagbangga sa duha ka barko sa China samtang nisuway pag-intercept sa usa ka barko sa Pilipinas duol sa Scarborough Shoal niadtong Lunes, Agosto 11.
Sa usa ka pakighinabi, ang Estados Unidos mipahayag pinaagi sa US Ambassador to the Philippines nga si MaryKay Carlson nagpahayag ug simpatiya sa insidente sa bangga ug naglaum nga kini magsilbi nga “watershed event” nga mahimong mosangpot sa pagkunhod sa mga agresibong aksyon sa WPS.
Giklaro usab sa US envoy ang deployment sa duha ka US Navy warships nga mao ang USS Higgins ug USS Cincinnati, duol sa Panatag Shoal (Scarborough Shoal) usa ka adlaw human sa pagbangga sa mga barko sa China sa maong lugar.
Gidepensahan ni Carlson ang lakang sa US Navy isip kabahin sa freedom of navigation operations (FONOPs) niini sa rehiyon.
Suno sa US envoy, ang militar sa US bug-os nga nipasalig sa pag-operate sa kahanginan sa maong kadagatan subay sa international law.
Gidayeg usab sa US envoy ang pagka-propesyonal sa PH Coast Guard human mitanyag og tabang sa naguba nga barko sa China human sa bangga apan nagpahayag usab og kasagmuyo sa padayong ilegal, mapugsanon, agresibo ug opensiba nga kalihokan sa militar sa China.
