Nagtinguha nga babagan sa usa ka U.S. federal judge sa Washington ang giplano nga Ultimate Fighting Championship (UFC) event sa White House nga gi-host ni President Donald Trump, nga gikatakda sunod semana.
Kung diin, usa usab sa gitinguha nga ihunong ang pagtukod sa usa ka dako nga metal structure nga arena nga gitawag og “The Claw” sa South Lawn sa White House.
Sumala sa reklamo nga gisang-at niadtong Sabado, duha ka residente sa Washington ang nangayo sa korte nga mag-isyu og temporary restraining order aron mapahunong ang kalihokan nga gitawag og “UFC Freedom 250.”
Ang maong event gikatakda sa Hunyo 14, nga mao usab ang ika-80 ka tuig nga adlawng natawhan ni Trump.
Nasuta nga ang away pagahimoon sulod sa 92-foot nga octagon-shaped cage, samtang ang weigh-in himuon sa Lincoln Memorial.
Gikuwestiyon sa mga nagdemanda ang paggamit sa mga pampublikong lugar sama sa White House South Lawn ug Lincoln Memorial alang sa usa ka pribadong sporting event.
Giingon nila nga supak kini sa mga lagda ug kinahanglan pa og aprobasyon sa Kongreso, ilabi na sa pagtukod sa dagkong istruktura.
Sa laing bahin, gi-reject sa White House ang reklamo ug gitawag kini nga “obstructionist, baseless, ug frivolous lawsuit,” ug miinsistir nga ang kalihokan kabahin sa mga opisyal nga aktibidad nga kasagarang gihimo sa White House ug National Mall.
