Gipanghimakak sa United States Central Command ang report nga nakaigo ang Iran sa usa ka barko sa U.S. Navy, human sa mga taho gikan sa pipila ka mga ahensya sa balita sa Iran nga adunay barkong giatake duol sa usa ka pantalan sa habagatan-sidlakan sa Strait of Hormuz.
Sumala sa Iran, nakalapas ang maong barko sa seguridad sa kadagatan ug napugos kini sa pag-atras.
Apan miinsistir ang U.S. Central Command nga walay barko sa U.S. Navy nga naigo sa maong insidente.
Sa samang higayon, nagpahibalo ang militar sa U.S. og usa ka bag-ong inisyatibo nga gi-endorso ni U.S. President Donald Trump, nga magtugot sa mga naval ug air assets sa pag-escort sa mga komersyal nga barko agi sa Strait of Hormuz, diin daghan na ang na-stranded tungod sa nagkataas nga tensyon.
Gitawag sa Iran ang maong lakang sa U.S. nga usa ka paglapas sa kasamtangang ceasefire, samtang gipasiugda sa Estados Unidos nga kabahin kini sa “Project Freedom,” nga nagtumong sa pagtabang sa mga na-stranded nga marinero nga nag-atubang sa kakulang sa pagkaon ug tubig taliwala sa tensyon sa rehiyon.
