Migawas sa classified preliminary intelligence report sa US nga pakyas ang US nga maguba sa pagpamomba ang nuclear capability sa Iran.
Ingon man nga mamahimong malangan og pila ka buwan ang nuclear program sa Iran tungod sa pag-atake, butang nga sukwahi sa pangagkon ni US President Donald Trump nga naguba kini.
Sumala sa usa ka taho nga gipagawas sa Defense Intelligence Agency, ang mga strike nagpugong lamang sa pag-access sa duha ka mga pasilidad sa nukleyar apan wala maguba ang mga bilding sa ilawom sa yuta.
Basi sa usa ka indibidwal nga pamilyar sa intel report, pipila ka mga centrifuges nagpabilin intact.
Gikumpirmar ni White House Secretary Karline Leavitt ang pagkatinuod sa assessment apan giingon nga kini lagmit sayop ug kini giklasipikar nga “top secret” apan na-leak gihapon.
Dugang pa niini nga ang pagka-leak sa assessment, usa ka tin-aw nga pagsulay sa pagdaot ni Pres. Trump ug aron wagtangon ang kaisog nga gipakita sa mga fighter pilot nga mihimo sa malampusong misyon sa pagbungkag sa nuclear program sa Iran.
Samtang, gitawag ni Trump ang mga balita nga mikaylap bahin sa kaepektibo sa ilang pagpamomba sa mga nukleyar site sa Iran nga “fake news.”
Bisan pa sa taho sa US Defense Intelligence Agency (DIA) nga ang underground nuclear nga pasilidad sa Iran wala madaot ug ang nukleyar nga programa niini malangan lang ug pipila ka bulan.
Apan matod ni Trump, “inconclusive” ang report ug gibarugan niini nga naguba na ang mga pasilidad.
Ingon man nga nasayod na ang tanan kung unsa ang mahitabo kung ang 14 nga 30,000 pound nga bomba ihulog sa ilang mga target ug nga kini usa ka “total obliteration” o hingpit nga pagkaguba.
Niadtong Hunyo 24, ang gobyerno sa Iran miingon nga naghimo sila og tukma nga mga lakang aron masiguro ang pagpadayon sa ilang nukleyar nga programa nunot sa pagpamomba sa US sa ilang mga pasilidad sa nukleyar.
Usa ka magtatambag sa Iranian Supreme Leader mipahibalo usab nga ang ilang nasud aduna pa’y mga stock sa enriched uranium ug miinsistir nga “ang dula wala pa mahuman”.
Mahinumduman nga ang panagbangi tali sa Iran ug Israel nagsugod niadtong Hunyo 13, 2025, human ang Israel naglunsad og mga air strike sa mga nukleyar nga mga dapit, ug mga nag-unang base militar sa Iran sa tumong nga hunongon ang ilang mga paningkamot sa nukleyar.
