Nagpasidaan ang Nomura Global Research nga ang bag-ong gipahamtang nga 19% U.S import tariff mas dako og epekto sa ekonomiya sa Pilipinas kompara sa Indonesia, bisan pa sa susamang lebel sa buhis nga gipahamtang sa duha ka nasod.
Sumala sa taho sa Japanese investment bank, ang gross domestic product (GDP) mahimong mous-os og 0.4 percentage points (ppt) sa 2025 tungod sa taripa—doble ang gipaabot nga epekto sa Indonesia nga 0.2 ppt lang.
Giila kini sa Nomura nga “substantial” ang epekto sa Pilipinas, ilabi na kay ang baseline GDP forecast sa nasud anaa sa 5.3%, ubos sa target sa administrasyong Marcos nga 5.5 ngadto sa 6.5%.
Nagkanayon usab ang Nomura nga una nilang nahuna-hunaan nga ipaubos sa 10% ang buhis sa mga export sa Pilipinas, nanghinaut nga ang Pilipinas mahimong kaalyado sa Estados Unidos ug dili usa ka transit point alang sa transshipment.
Apan, human sa bilateral meeting tali ni Presidente Ferdinand Marcos Jr. ug US President Donald Trump, nagpabiling taas ang buhis sa 19%—mas taas pa sa lebel sa “Liberation Day” nga 17%.
Sa pikas bahin, pagkahuman usab sa pagbisita sa Washington, gipahibalo usab ni Marcos nga tangtangon sa Pilipinas ang mga taripa sa mga salakyanan sa US ug mag-import ug daghang soybeans, wheat, ug pharmaceutical products.
Sa usa ka lahing pakigtuki, si Gareth Leather sa Capital Economics sa UK niingon nga ang diplomatikong kusog dili igo aron maimpluwensyahan ang mga kasabutan nga gipahamtang ni Trump.
Samtang gibanabana nga mas dako ang kapildihan sa GDP sa Pilipinas, gipasiugda sa Nomura nga ang Indonesia mahimong maapektuhan sa nagkadaghang importasyon sa mga produkto sa US, nga mahimong makapabug-at sa economic growth ug twin deficits niini.
