Gisuspinde sa Estados Unidos ang operasyon sa mga serbisyo sa konsulado niini sa Brazil, samtang gisira usab sa Australia ang embahada niini sa nasod, duha ka adlaw sa wala pa ang eleksyon sa pagkapresidente tungod sa mga kabalaka sa seguridad.
Matod sa Federal Police sa Brazil, nagpatuman sila og preventive search ug seizure warrants human makadawat og impormasyon kabahin sa usa ka hulga batok sa mga diplomatic facilities sa Estados Unidos.
Apan, wala’y nakit-an ang mga awtoridad nga ebidensya o suspek nga makapamatuod sa maong hulga.
Nahitabo ang pagsira sa mga pasilidad samtang nag-andam ang Brazil alang sa eleksyon, diin nag-atubangay sa presidential race ang kasamtangang Presidente nga si Luiz Inácio Lula da Silva ug si Senador Flávio Bolsonaro, anak sa kanhing Presidente nga si Jair Bolsonaro.
Si Jair Bolsonaro anaa karon sa prisohan tungod sa usa ka kaso nga may kalabotan sa giingong pagsulay sa kudeta.
Samtang, gikuwestiyon sa mga kaalyado ni Lula ang kalit nga pagsira sa mga diplomatic facilities ug gihulagway kini isip posibleng langyaw nga pagpanghilabot, ilabina sa bahin sa Estados Unidos, sa opinyon sa publiko ug sa proseso sa eleksyon sa Brazil.
Sa laing bahin, mipahayag si US President Donald Trump sa iyang suporta kang Flávio Bolsonaro ug miingon nga hugot niyang gibantayan ang dagan sa eleksyon.
