MANDAUE, CEBU-Naluwas sa mga rescuer ug mananagat ang usa ka 16-anyos nga batan-ong lalaki gikan sa pagkalumos human kini gikatahong nahulog sa ikaduhang taytayan nga nagdugtong sa Mactan Island ug mainland Cebu niadtong Dominggo sa gabii, Marso 10.
Sa pakighinabi sa Bombo Radyo Cebu Newsteam kang Felix Suico Jr., ang operation head sa Mandaue City Disaster Risk Reduction and Management Office (CDRRMO), nga kompirmadong nakadawat sila og tawag gikan sa mga concerned citizen, nga miingon nga adunay nahulog sa Marcelo Fernan Bridge pasado alas 7:56 sa gabii sa Domingo.
Hinungdan nga mipahigayon dayon og hiniusang search and rescue operation, ang CDRRMO sa Mandaue ug Lapu-Lapu, BFP sa Dakbayan sa Lapu-Lapu ug sa SWAT sa Mandaue.
Dugang niini, nga nakit-an ang biktima paglabay sa pipila ka oras human ang mga mananagat sa Catarman, Liloan, ang nitaho nga nakit-an ang usa ka batang lalaki nga naglutaw sa palibot sa baybayon.
Gani, dali nga gidala ang wala na’y panimuot nga batan-ong lalaki ngadto sa mga rescuer duol sa Marcelo Fernan Bridge ug gidala sa Mandaue City Hospital.
Sa kasamtangan ang bata padayon pang gi-confine hangtod sa pagsulat ning balitaa.
