CEBU CITY-Natanggong karon sa Malabuyoc Police Station ang 53-anyos nga lalaki human nga gidunggab ang iyahang bayaw sa makadaghang higayon sulod sa ilahang panimalay sa Sitio Calugtugan Barangay Cerdeña lungsod sa Malabuyoc habagatang Sugbo.
Giila ang maong suspect nga si Jobert Valera, 53-anyos samtang ang biktima giila nga si Honelyn Tamayo 31-anyos nga adunay 2 ka mga anak.
Base sa imbestigasyon, si Valera kalit lang nisulod sa panimalay sa biktima samtang nagpatotoy kini sa iyang duha ka buwan nga anak ug gidunggab kini sa makadaghang higayon.
Dugang niini, 6 ka higayon nga nadunggan ang biktima, 3 sa dughan, 2 sa buko-buko, ug usa sa walang bahin sa iyahang bukton.
Sa pagkakaron, wala pa masuta kung unsa gyud ang motibo sa pag pangdunggab sa suspek tungod kay di pa kini mutug-an ug igo ra niingon nga wala siya kabalo ngano nabuhat to niya.
Padayon pa gihapon ang imbestigasyon sa kapulisan samtang anaa pa kini sa ilahang kustodiya og posibleng pasakaan sa kasong murder ang maong suspetsado.
