CEBU CITY-Nadumbolan patay sa aluminum van ang usa ka 82-anyos nga lola human nga milabang sa pedestrian lane niadtong Enero 9, 2023 pasado alas 5 sa hapon didto sa National Highway Brgy. Linao Lipata Minglanilla Cebu.
Giila ang maong biktima nga si Asuncion Doque, 82-anyos nga taga Brgy Lower Lipata Minglanilla Cebu.
Kauban usab nga naligsan ang anak sa biktima nga si Estela Tuason, 58-anyos nga residente usab sa susamang lugar diin nga padayon pa nga nagpa ayo sa tambalanan.
Samtang ang driver sa Aluminum Van giila nga si Jimmy Castro Misa, 46 anyos nga taga Balirong Naga.
Gibutyag ni Police Staff Sergeant Mark Rosaroso, base sa pag tan aw nila sa CCTV footage, nakita nga ni overtake ang sakyanan nga Aluminum Van apan kalit nalang niini nabanggaan ang duha ka biktima.
Samtang, anaa na karon sa kustodiya sa kapulisan ang maong suspek ug gihuwat nalang na mapasakaan og tukmang kaso tungod kay naghuwat pasad ang kapulisan sa pamahayag sa pamilya sa mga biktima basin nga makighusay nalang apan matod pa sa kapulisan, posible nga mapasakaan og kasong Reckless Imprudence resulting in Homicide and Physical Injury ang maong driver.
