CEBU CITY-Patay ang usa ka construction worker human gidunggab sa iyang gikainom niadtung Miyerkules sa gabii, Agusto 23, 2023 apan pagka Huwebes na sa buntag napalgan Agusto 24, 2023 sulod sa bunk house sa Sitio Tagaytay, Barangay Adlaon bukirang dapit sa dakbayan sa Sugbo.
Giila ang biktima nga si Benjamin Eñigo Kangke, 56 anyos nga taga Balamban samtang ang nagdunggab kaniya mao si Joseph Udtohan, 42 anyos nga taga Barangay Lusaran sa dakbayan sa Sugbo.
Sa imbestigasyon sa Adlaon Police Community Precinct, nasayran nga nag inom ang suspek ug ang biktima apan sa dihang nangahubog na wala na modawat sa tagay ang suspetsado.
Dugang pa, nga nasuko ang biktima nga mibalibad na ang suspetsado sa gitagay niini nga hinungdan nga mikuha nig kutsilyo ug midunggab sa suspek.
Apan nakabantay ang suspetsado nga si Joseph Udtohan, hinungdan nga mikuha usab kinig tubo dayong bunal sa biktima tumong sa ulo ug miilog sa kutsilyo sa biktima nga mao usab ang iyang gigamit sa pag dunggab sa walang dughan nga mi resulta sa iyang kamatayon.
Boluntaryo nga mitahan sa iyang kaugalingon ang suspetsado ngadto kang Kapitan Agustin Partolan sa Adlaon ug giturn-over sa police station.
