Gipahimangnoan ni Dr. Rene Josef Bullecer ang publiko nga magbinantayon batok sa sakit nga dengue, ug giklaro nga walay bisan kinsa ang “dengue-proof” bisan pa og natakdan na niini kaniadto.
Sumala ni Dr. Bullecer, ang mga lamok nagsilbi lamang nga carrier o tigdala sa dengue virus. Sa higayon nga mapaakan ang usa ka tawo, moipon ang kagaw sa dugo ug mokatap sa nagkadaiyang parte sa lawas. Tungod niini, ang platelet sa dugo mao ang unang maapektuhan o atakehon sa maong virus.
Gipasabot usab sa eksperto nga kasagarang mogawas ang mga sintomas sa dengue sulod sa upat (4) ngadto sa napulo (10) ka adlaw human mapaakan sa lamok. Apan kon isog o potent ang klase sa dengue virus, posibleng magsugod na og hilanat ang pasyente sulod lamang sa tulo (3) ka adlaw.
Bisan pa man niini, adunay mga tawo nga natakdan apan walay makita nga sintomas, ilabi na ang mga first-timer. Apan gipaklaro ni Dr. Bullecer nga dili kini angay ikompiyansa tungod kay mahimong matakdan pag-usab ang usa ka tawo bisan og nagka-dengue na siya sa miaging tuig.
Labaw sa tanan, gihatagan og gibug-aton ni Dr. Bullecer ang pagpanalipod sa kabataan. Matod niya, mas bulnerable ang mga bata sa maong sakit tungod kay huyang pa ang ilang immunity, hinungdan nga mas daghan kanila ang mosangpot sa mas grabe nga kondisyon nga gitawag og dengue hemorrhagic.











