CEBU – Gibutyag sa hepe sa Bohol Provincial Police Office (BPPO) nga si Col. Osmundo Salibo nga daghang “persons of interest” (POIs) ang gilantaw sa sunodsunod nga mga pagpanulis sa highway sa probinsiya diin nakuhaan sa mga suspek ang nagkadaiyang kompanya og kapin P1 milyon.
Sa usa ka taho, nagkanayon si Salibo nga nahimo ang walo ka delivery truck robbery sulod sa wala pay usa ka semana gikan Hulyo 19 hangtod 23 ug posibleng binuhatan sa usa ra ka grupo.
Bisan og ang matag pagpanulis gihimo lang sa duha ka mga lalaki nga riding-in-tandem, nituo ang kapulisan nga kapin sa duha ka tawo ang miyembro sa robbery group gumikan sa kadaghan sa insidente sa pagpanghold-up.
Atol sa paghandum sa Bohol Day niadtong Hulyo 22, tulo na ka insidente sa pagpanulis ang nahitabo sa lungsod sa Guindulman, Loon ug Baclayon.
Hinuon, nakuhaan og CCTV footage ang mga armadong suspek samtang nag-hold up sa mga delivery truck sa lungsod sa Baclayon ug Loboc.
Ug ning bag-ohay lang nitanyag og P100,000 nga reward ang kagamhanang probinsiyal ngadto ni bisan kinsa nga mohatag og impormasyon nga mahimong mosangpot sa pag-ila o pagkasikop sa mga tulisan.
