CEBU CITY-Nasikop ang usa ka lalaki human kini mulukat unta og police Clearance sa Mabolo Police Station ning dakbayan sa Sugbo niadtong Nobyembre 7, 2024.
Giila ang dinakpan nga si Elberto Maxino, 47 anyos, lumad nga taga Tanjay, Negros Oriental ug kasamtangan nagpuyo sa Sitio Langub, Brgy. Guadalupe ning dakbayan sa Sugbo nga mikuha ug police clearance sa Mabolo Police Station para gamiton unta sa ilang trabaho sa trucking.
Apan mipasalig ang lalaki nga iyang atubangon ang kasong nakalatid sa iyang record nga mao ang “murder”
Subay sa panghitabo nga sa pagkahibalo sa mga kapulisan nga aduna kiniy aktibong kaso, dali siyang gibutang sa kustodiya sa kapulisan human nakita sa National Police Clearance system nga aduna siyay pending warrant of arrest sa kasong Murder nga gipasaka didto sa RTC 7, Branch 45, sa dakbayan sa Bais, Negros Oriental.
Sa pagpakighinabi sa Bombo Newsteam kang Maxino, iya gisaysay nga iya giserbisyohan didto sa Bais ang kasong murder pero tungod walay aksyon ang mga tagtungod sa namatay mao nidesisyon siya nga manginabuhi diri sa Dakbayan sa Sugbo.
Dugang pa niya, kapila na siya makakuha ug police clearance sa pipila na katuigan maong nahibulong siya nga nalutsan siya ug warrant of arrest nga mipakita sa iyang record.
Hingpit nga gibarugan sa dinakpan nga iya atubangon ang mao nga kaso para malimpyo ang iya pangalan ug makapanginabuhi siya ug tarong para sa iyahang pinilanggang pamilya.
