CEBU – Wala maka-uyon si Barili Mayor Marlon Garcia sa kamanduan sa Department of Interior and Local Government (DILG) nga mag “work from home” angpipila ka mga empleyado niini luyo sa gi-atubang nga krisis sa Coronavirus Disease 2019.
Matod ni Mayor Garcia nga nasabtan niya ang katuyuan sa buhatan nga proteksiyunan ang mga trabahante sa makamatay’ng virus. Apan gihimug-atan niini nga gikinahanglan nila ang presensiya sa mga opisyal sa Municipal Local Government Offices isip partner sa paghatag og tabang sa katawhan.
Matod sa Mayor nga adunay mga kamanduan nga nanginahanglan og direktang supervision sa mga taga DILG maong kinahanglan nga anaa sila sa buhatan.
Dason pa sa Mayor nga lisod usab ang komunikasyon sanglit hinay ang internet connection sa lungsod sa Barili hinungdan nga ma-delatar ang paghatag og tubag sa mga problema.
Subay niini naglaum si Garcia nga maka-abot kang DILG Sec Eduardo Año ang maong concern sanglit posibleng dili lang ang lungsod sa Barili ang nagka-problema og susama niini.
