PROVINCE OF CEBU- Patong-patong nga kaso ang ipasaka batok sa usa ka pulis nga sarhento ug kauban niining sibilyan kinsang gitumbok nga nanulis og cellphone ug nipabuto og armas sa Lower Linao, Barangay Lipata, Minglanilla gahapong adlawa.
Giila ang pulis nga si Police Staff Sgt. Abraham Quijano a.k.a. Brian Quijano, 45-anyos, residente sa Brgy. Tapul, Talisay City kinsa na-assign sa Regional Mobile Force Batallion (RMFB 7) apan kasamtangang gi-detail isip driver sa Office of the Regional Staff sa PRO7.
Samtang, ang sibilyan nga giingong iyang kauban mao si Joel Butron Mandras, 41-anyos ug lumulupyo sa susamang barangay.
Girespondihan dayon sa mga sakop sa Minglanilla Police Station ang usa ka furniture shop nga anaa nahimutang sa Purok Nangka, Lower Linao, Lipata human nadawat ang reklamo sa duha ka mga biktima nga giingong kalit gisulod sa mga suspek ug gilabni ang cellphone gikan sa usa kanila.
Pipila ka minuto ang milabay laing biktima mitungha ug mitaho nga duha ka mga lalaki, usa nga adunay armas, dayag nga nagpakita sa iyang FA ug nisulod sa usa ka warehouse ug nitumbok kanila nga nisinggit matud pa ang mga suspek og “mga manyakis mi.”
Nisibat dayon ang mga suspek apan nagpasalba ang usa kanila gani daghang witness ang nakakita hinungdan nga gilusad ang “hot pursuit operation” batok sa duha nga susamang nangasikop.
Kasong Violation to Domicile, illegal discharge of firearm ug theft ang ipasaka batok sa duha ka mga suspek kinsang mga nabalhog karon sa Minglanilla Municipal Police Station.
Ingon man nga gisusi usab kung ang maong sarhento mao ba gihapon si PO2 Brian Quijano nga gitumbok nga nihimo og indiscriminate firing sa iyang service firearm pipila na ka tuig ang nilabay sa Barangay Tapul, Talisay City human giingong gibuwagan kini sa iyang uyab. | via Bombo Rexmond Omega
