CEBU CITY-Gidakop ang usa ka rapper-singer human niini gipusil naangol ang usa ka langyaw sulod sa Agua Bar compound sa Waterfront Hotel sa dakbayan sa Sugbo,Domingo sa buntag, Marso 17, 2024.
Gikompirmar kini ni Police Col. Ireneo Dalogdog ang City Director sa Cebu City Police office, atol sa pakighinabi sa Bombo Newsteam, ug gidugang nga ang kapulisan sa Mabolo Police Station-4, nakadawat ug alarma sa pagpamusil atubangan sa usa ka sikat nga bar sulod sa compound sa hotel sa Brgy. Lahug, dakbayan sa Sugbo.
Dugang pa niini, nga pag-abut sa kapulisan ilahang nasuta nga nalambigit kini sa usa ka langyaw ug usa ka rapper ug singer nga nakabase sa Sugbo.
Giila niini ang suspek nga si Jed Andrew Salera, usa ka Cebu-based rapper ug singer nga adunay professional name nga “Range 999”.
Samtang ang biktima giila nga si Michael George Richey, usa ka langyaw.
Misibat si ‘Range 999’ human sa nahitabo, apan pipila ka oras ang milabay nadakpan kini sa mirespondeng mga polis sa Sunshine Valley, Brgy. Quiot Pardo sa dakbayan sa Sugbo.
Dugang pa sa opisyal, nga base sa surveillance footages, ang gunman misulod sa compound sakay sa kolor blue nga sports utility vehicle (SUV), nga positibong giila nga si Saler o Range 999.
Kung diin sa dihang nihinay ang pagdagan sa SUV atubangan sa bar, nakit-an ang biktima nga niduol sa driver side.
Apan, sa dihang giablihan sa drayber ang pultahan, si Richey daling natumba sa semento.
Nakaangkon ang langyaw og samad pinusilan sa iyang abaga ug paa, kinsa gihatod dayon siya sa duol nga tambalanan ug anaa na sa luwas nga kahimtangan.
