Gipamusil ang 3 ka mga indibidwal kinsa parehong taga Inabanga, Bohol, ug nag-sakay sa usa ka wooden bangka sa Don Bosco Sitio Mahayahay Uno, seawall sa Brgy. Pasil, Cebu City, pasado alas 2:15 sa hapon niadtong Nobyembre 2, 2025.
Sa tulo ka mga sakay sa maong bangka, duha niini ang mananagat sila si Marvin Duallo Moreno, 27 anyos, ulitawo, ug si Efren Tancos, 44 anyos, ulitawo nga mao ang namatay sa maong panghitabo. Samtang ang usa sa mga biktima mao si Winston Cabigon Caparida, 25 anyos, nga gitoohang nanuhol sa duha ka mananagat sa pagsugat sa iyahang pamilya nga anaa nahimutang sa Bgry. Ermita ning Dakbayan sa Sugbo, aron dalhon kini sa Probinsya sa Bohol para managkot atol sa kalag-kalag.
Subay niini, ekslusibong nakuha sa Bombo Radyo Cebu team ang habig ni PCapt. Charisma Gonzales, ang tigpamaba sa CCPO, diin iyang gikabutyag nga sa maong insidente, padayun pa ang imbestigasyon kabahin niini, ug aduna na silay lima ka mga Person of Interest (POI) nga namat-an sa maong panghitabo nga karon padayun pa usab ang ilahang imbestigador sa pagsuta.
Dugang niya, bisan paman nga adunay rason si Winston nga kuhaon niya ang iyang pamilay sa Sugbo, apan nakitaan ni PCapt. Gonzales nga aduna pay laing anggulo sa maong insidente, diin mao kana ang ilahang gibusisi nga gitun-an sa kasamtangan.
Gani, iyahang giklaro nga wala pa silay kasayuran sa kung unsa ang mga firearms ang gigamit sa mga suspek, kay anaa man kini sa dagat nahitabo mao nga lisud sa pagsuta.
Sa pagkakaron, si Winston ug Marvin anaa pa sa Cebu City Medical Center (CCMC) alang sa hinanaling pagpatambal, samtang ang sakop sa kapulisan padayun usab sa pag-trace sa CCTV footage aron hingpit na nga masuta ang tinubdan sa maong insidente.
