PROVINCE OF CEBU-Patay ang drayber sa motorsiklo samtang naangol ang iyang angkas sa aksidente nga nahitabo 1:55 a.m. Dominggo, Marso 3, 2024 sa national road, sa Barangay Poblacion, sa lungsod sa Liloan, amihanang Sugbo.
Giila ang biktimang drayber sa motorsiklo nga si Chris John Barro Fontanoza,19, ug taga Barangay Pulpogan, Consolacion samtang ang angkas niini nga naangol mao si Beverly Nayre nga taga Barangay Pulpogan.
Sa inisyal nga imbestigasyon nga gihimo, nasayran nga ang duha ka mga sakyanan nagsubay sa atbang nga direksyon.
Matod ni Police Major Eric Gingoyon ang hepe sa kapulisan sa Lilioan Police Station, ang Honda motorcycle nagpadulong sa amihanang direksyon nga gimaneho ni Chris John Barro Fontanoza, samtang ang Toyota HIACE, gimaneho ni Angelito Alistre Alivio, 49-anyos taga dakbayan sa Naga nagbiyahe paingon sa habagatan nga direksyon ug sa pag-abot sa nahisgutang lugar sa insidente, si Alivio nihimo og counter flow sa pikas lane.
Tungod niini, nabangga siya sa motor nga gimaneho ni Fontanoza ug tungod sa impact, nabangga kini sa karsada ug ang drayber ug ang iyang back rider nawad-an sa panimuot ug daling gidala sa pinakaduol nga tambalanan alang sa medikal nga pagtagad.
Apan, alas 2:42 sa kaadlawon, namatay si Chris John Barro Fontanoza, sa Danao district hospital tungod sa mga samad nga naangkon sa nahisgutang insidente.
