DAVAO CITY-Nakaani og nagkandaiyang reaksyon sa social media ug kadaghanan niini puro pagsaway tungod sa gidangatan sa tulo ka tulisan nga dagko ug nindot nga mga armas ang bitbit ug nanulis sa Hanna’s Pawnshop nga nahimutang sa Illustre St. sa dakbayan sa Davao apan gubaon diay ang motor nga gigamit nila.
Daw nag-abot ang gaba sa dihang gawas nga wala miandar ang motor kay ‘timing’ usab nga nag stop light hinungdan nga nanghunong ang mga sakyanan nga nag-una sa ilaha.
Hinungdan nga daling nadakpan sa kapulisan sa dakbayan sa Davao ang usa sa mga suspek sa pagpangawat.
Kasamtangang padayon pa ang hot pursuit operation sa kapulisan sa pagkasikop sa ubang kaubanan niini.
Samtang, ang maong pawnshop kay gipanag-iya usab sa ginakanan sa usa sa mga sikat karon nga content creator nga si Crist Briand o mas nailhang ‘Brader’ diin matud niya nga nasayod nalang siya nga gitulis ang ilang pawnshop pinaagi sa facebook post.
Matud usab sa ubang netizens ug mga supporters niini nga wala nabantayan ang ‘matrix’ dapit sa ilang tindahan hinungdan nga nahitabo ang pagpanulis.
