CEBU CITY-Balhog na sa prisohan sa Mambaling Police Station ang suspek sa pagnanulis ug pagpamusil sa 18-anyos nga batan-on sa Alumnus Asupwa, Barangay Basak San Nicolas ning dakbayan sa Sugbo.
Giila ang dinakpan nga si Bryan Fernandez, 24-anyos ug lumulupyo sa samang barangay sa nahitaboan sa krimen.
Narekober sa mga kapulisan sa suspek ang usa ka kalibre 45 nga pistola ug tulo ka mga buhing bala nga posibling mao ang murder weapon sa pagpamusil-patay sa biktima.
Giangkon sa dinakpan ang maong panghitabo ug matod niya nga ang kwarta ug selpon na nakuha kay panggasto kini sa pamugas sa inadlaw nga kaon.
Tumong sa unta ni Fernandez ug sa laing suspek nga wala pa madakpi nga tulison ang biktima apan nanlaban kini hinungdan nga naka aghat sila nga pusilon diha-diha dayon.
Dugang pa nga giingong kanhi piniriso si Fernandez sa kasong paghupot sa illegal nga drugas niadtong tuig 2022.
Kahinumduman nga ang biktima giilang si John Lloyd Delos Reyes Bejec ang gipusil patay sa duha ka armadong suspek sa pagpanulis sa iyang selpon ug cash nga P3,600 niadtong Biyernes sa gabii Septiyembre 27, 2024.
