CEBU – Nasikop na sa kapulisan ang suspek sa pagpatay sa usa ka 67 nga byuda nga negosyanteg utanon sa Barangay Greenhills bukirang barangay sa lungsod sa San Fernando.
Atol sa eksklusibong pakighinabi sa Bombo Radyo Cebu kang Police Master Sergeant Herbert Pananganan , ang imbestigador sa San Fernando Police Station, anaa na ubos sa ilahang kustodiya ang suspetsado nga si Larry Lantape Sabellano, 39 anyos, residente ra usab sa nahisgutang lugar.
Base sa nakuhang impormasyon, gibutyag ni Pananganan nga utangan ang suspetsado sa biktima og hangtod sa kasamtangan wala pa kini makabayad inay gusto pa niini nga pun-an ang gi-utang.
Dugang ni Pananganan nga mo-kooperar raman hinuon ang suspetsado apan pabilin gihapon niini nga gilimod ang gibuhat nga krimen.
Positibong gitudlo ang suspek sa usa ka indibidwal nga nahimong testigo sa maong krimen og adunay pipila ka indibidwal nga nisupport niini.
Kahinumdoman nga niadtong Huwebes sayo sa kaudtohon, nakit-ang wala nay kinabuhi si Diomedesa Gedaro, 67 anyos, nga gituohang gihagbong sa pangpang og gigolgol ang liog human gitulis.
