CEBU CITY — Gisugdan na sa managlahing mga tambalanan sa Sugbo ug Central Visayas ang pagpaturok sa mga medical workers gamit ang COVID-19 vaccine nga gikan sa Chinese drug company nga Sinovac.
Gihangop sa mga medical workers sa Chong Hua Hospital ang vaccine rollout gumikan sa nakitang resulta sa panglawas human nahatagan og Coronavac, ang bakuna nga ginama sa Sinovac.
Matud sa head sa vaccination post nga si Dr. Faith Villanueva nga nilapas na sa ilang pasiunang target ang mga nabakunahan na.
Apan gamay lang ang nakasinati og minor adverse effects nga sagad pagabantayan matag 15 minutos sa post-vaccination area.
Gihulagway ni Dr. Villanueva nga dako og tabang ang impluwensya sa mga head doctors hinungdan nga niabot sa 70 porsyento sa mga medical workers ang interesadong maturukan og Sinovac vaccine.
Sanghinaut ang mga nagdumala sa Perpetual Succour Hospital sa dakbayan sa Sugbo nga modaghan pa ang mga medical workers nga mabakunahan og Sinovac COVID-19 vaccine.
Matud sa in-charge sa observation area nga si Dr. Ian Teodorico nga sa pagkakaron, walay medical worker ang nakasinati og bisan unsang major adverse effects human nahatagan sa maong bakuna.
Kini bisan pa man og katunga gikan sa 1,200 kapin ka mga trabahante ang interesadong mabakunahan niini atol sa ilang survey.
Dugang pa ni Dr. Teodorico nga padayon lang gihapon ang paghatag og impormasyon kabahin sa kamahinungdanon sa bakuna batok sa COVID-19 ilabi na ang paggamit sa Sinovac.
Gipasigarbo usab sa administrator sa tambalanan nga si Dr. Ronald Oporto ang kasinatian niini isip labing unang medical worker nga nahatagan sa maong bakuna.
Matud ni Dr. Oporto nga komportable ang pamati niini human nga nabakunahan na ug wala kini bati nga gibati sa iyang panglawas, pipila ka oras na ang nakalabay.
Nanghinaut kini nga pinaagi sa maong lakang, makumbinsir usab ang ubang medical workers nga magpabakuna usab gamit ang Coronavac nga gikan sa China.
Gitataw usab niini nga magdepende lang sa mga medical workers kung unsang bakuna ang gustong ipaturok kanila ug kinahanglan gihapong mosunod sa mga health protocols.
Pipila usab sa mga tambalanang nagsugod na sa vaccine rollout mao ang Cebu Doctors University Hospital sa Cebu City, Silliman University sa Dumaguete City, ug uban pa.
