CEBU PROVINCE-Molingkod una isip acting governor si Cebu Vice Gov. Hilario Davide III human nga mobiya gawas sa nasud sa Gov. Gwendolyn Garcia alang sa usa ka personal trip.
Gibutyag ni Garcia, atol sa usa ka press conference karong hapon, nga giisip kini niya nga first break sukad sa tuig 2019 nga siya milingkod sa iyang termino isip gobernador sa lalawigan sa Sugbo.
Matod ni Garcia nga motambong ug motan-aw siya sa pagsalmot sa iyang anak nga si Paolo sa ironman challenge ngadto sa nasud sa Italy.
Sa pangutana kon aduna bay tugon si Garcia kang Davide, gitug-an niini sa mga tigbalita nga gihatag nani Garcia ang responsibilidad nga modumala sa lalawigan samtang kini mag-break.
Mobalik si Garcia sa Septyembre 20 ug human molarga na usab alang sa official trip sa nasud sa South Korea isip pagtambong sa East Asia Tourism Forum (EATOF).
Ang pagtambong unya niini sa EATOF ang labing unang official trip ni Garcia gawas sa nasud.
