CEBU – Usa ka adlaw sa dili pa ang deadline sa pagsumitir sa State of Contribution and Expenditures (SOCE) sa nagpapili nga kandidato niadtong nakalabay nga eleksyon, walo pa lang ka mga election winners ang naka-file niini.
Basi sa record sa Commission on Elections (Comelec) Cebu Province, si Vice Governor Hilario Davide III ang pinaka-una nga misumitir sa iyahang SOCE niadtong Mayo 23.
Si Davide ang muserbisyo isip second-termer sa pagka-bise gobernador sugod karung Hunyo 30.
Gawas ni Davide, naka-file na usab sa ilahang SOCE niadtong buwan sa Mayo sila si outgoing 2nd District Provincial Board Member Jose Mari “Tata” Salvador ug reelected 1st District Provincial Board Member Raul Bacaltos.
Pipila sa mga kandidato gikan sa 4th District sa Sugbo ang nakasumitir na usab sa ilahang mga SOCE.
Gilangkoban kini nila ni ex-officio board member Celestino “Tining” Martinez III, aspiring Board Member Jose Brainard Mayol ug reelected Rep. Janice Salimbangon.
Samtang, niadtong Hunyo 1 nakasumitir na usab si Daphne Lagon sa 6th District ug reelected Board Member Thadeo Jovito ‘Jonkie’ Ouano.
Ugmang adlawa, Hunyo 8, ang deadline sa pagsumitir ug SOCE.
Ang mga midaug nga kandidato nga pakyas nga makasumitir sa ilahang SOCE kay dili tugotan nga makalingkod sa ilahang katungdanan.
