PROVINCE OF CEBU- Gidudahan ni Bantayan Vice Mayor ug kanhi Mayor Art Despi nga politikal ang isyu sa paglubong sa 178 ka sako o 8,900 ka kilo nga nadaot nga bugas sa administrasyon ni Mayor Alex Layese gahapon Oktubre 9, 2026.
Sa eksklusibong pakighinabi sa Bombo Radyo, gipasabot ni Despi nga ang bugas gikan sa National Food Authority o NFA gitagana alang sa mga emerhensiya ug kalamidad ubos sa Quick Response Fund o QRF.
Gidugang niini, nga wala kini maapod-apod tungod kay walay katalagman ug naabtan usab sa election ban.
Gikuwestiyon usab ni Despi kung posible bang nadaot ang tanang nahibiling stocks sa bugas sulod lamang sa walo ka bulan.
Dugang pa niya, isip presiding officer sa Sangguniang Bayan, wala siya makadawat og committee report kalabot sa pag-dispose sa bugas, diin ang maong komite gipangulohan sa igsoon ni Mayor Layese.
Una niini, nadiskobrehan ang mga bugas nga adunay agup-op human milingkod si Mayor Layese.
Gideklarar sa NFA nga dili na kini luwas alang sa konsumo sa tawo, samtang nakigkoordinar ang lokal nga kagamhanan sa Commission on Audit o COA alang sa hustong pag-dispose niini.
Sa laing bahin, gisulayan sa Bombo Radyo nga makuha ang reaksyon ni Mayor Layese.
Apan, sumala sa iyang staff, nagbiyahe ang mayor ug gilaom nga mobalik sa sunod semana.
Sa pagsulat niining balitaa, wala pa makuha ang iyang direktang tubag sa mga pahayag ni Despi.
