Cebu City- Nasayangan si Vice Mayor League of the Philippines Cebu Chapter President Vice Mayor Aurelio Damole sa pagkamatay sa ilang kauban nga si Ronda Vice Mayor Atty Jonnah John Ungab.
Matud ni Damole nga nakalitan ug naguol sila sa nahitabo ni Atty Ungab ug matud pa nga dakong kawad-on kini sa ilang grupo sa Vice Mayors League.
Sigon niini nga sa dugay niya nga pagkaila ni Atty Ungab makaingon gyud siya nga maayo kaayo siya sa iyahang trabaho sa pagka bise mayor ingon man sa pag ka abogado niini.
Dako matud pa ug gikatampo si Ungab ngadto na sa ilang grupo hilabi na sa mga legal nga aspeto. Gibutyag usab ni Vice Mayor Damole nga dili gayud siya kalimot sa dihang iyahang gisuol gayud ang abogado aron pahinumduman nga kanunay nga mag-amping sa iyahang trabaho human sa nahitabong pagpatay sa abogado ni Mayor Rolando Espinosa sa Leyte niadtong tuig 2016.
Matud pa nga gitubag lamang siya ni Ungab nga dili lang mabalaka sanglit wala siya mahadlok ug nasayod ,matud pa ang Ginoo nga gibuhat lamang niini ang iyahang trabaho. Subo lang palandungon matud ni Damole nga gipatay ang usa ka tawo ang andam nga mulaban sa mga tawo nga walay abogado ug sinsero sa iyahang trabaho.
Subay niini nakatakda nga magtigum ang VML Cebu Chapter aron hisgutan ang ilang tabang nga mahatag sa pamilya ni Atty Ungab ingon man mupasar sila ug resolusyon sa pagkondenar sa nahitabo sa ilang kauban ug pag awhag sa otridad nga hatagan ug hustisya ang kamatayon ni Atty Ungab.
