Napadayag sa iyang pahasubo si Vice President Sara Duterte sa mga kabanay sa tulo ka estudyante nga nangamatay sa nahitabong pagpamusil sulod sa San Jose National High School sa Tacloban City.
Pinaagi sa iyang opisyal nga Facebook post, gipaambit sa Vice President ang iyang personal nga pagbisita sa haya sa mga biktima nga giilang sila si Joyancee, Lorenz, ug Ayessa, uban ang paghatag og simpatiya sa nagsubong pamilya.
Matod pa kaniya, personal niyang gitunol ang kinasingkasing nga pahasubo, uban sa iyang tibuok pamilya ug sa buhatan sa Bise Presidente, ngadto sa mga tagatungod nga hilabihan karon ang kaguol sa gidangatan sa ilang mga minahal sa kinabuhi.
Subay sa pamahayag sa Bise Presidente, hugot nga nanawagan og hustisya ang mga ginikanan sa mga biktima ug naglaum nga dili na gayod masundan pa ang susamang trahedya sulod sa mga tunghaan.
Sa kasamtangan, nagpadayon pa ang gihimong imbestigasyon sa kapolisan kalabot sa maong krimen diin duha ka menor de edad ang gitudlong suspetsado. Ang usa kanila, nga nag-edad og 15 anyos, gikasohan na og patong-patong nga reklamo human mapamatud-i ang kalambigitan sa pagpamusil nga nikalas sa tulo ka kinabuhi ug nikaangol sa kapin sa 15 ka laing estudyante.
