Andam ang Vietnam nga makig-diyalogo sa Pilipinas aron maporma ang mga inisyatiba nga nahisubay sa interes sa duha ka nasud.
Kini human pormal nga nisang-at ang habig sa Pilipinas sa miaging semana ngadto sa United Nations og entitlement claim alang sa gilugwayan nga continental shelf sa gilalisan nga kadagatan nga gituohang abunda sa oil ug natural gas deposits ug isda.
Sa usa ka pamahayag, ang tigpamaba sa Vietnamese Foreign Ministry nga si Pham Thu Hang nagkanayon nga ang Vietnam nagpamatuod pag-usab sa ilang soberanya subay sa internasyonal nga balaod sa butang sa Hoang Sa o gitawag usab nga Paracel archipelago ug Truong Sa island o gitawag nga Spratly islands diin ang claimant mao usab ang Pilipinas.
Gidugang usab niini nga ang usa ka coastal state kinahanglang morespeto sa mga lehitimong katungod ug interes sa ubang may kalabutan nga coastal states nga adunay kaatbang o kasikbit nga mga baybayon sa pagsumite sa ilang claim para sa outer continental shelf boundaries.
Kahinumduman ang Vietnam ug Pilipinas apil sa mga claimant sa mga bahin sa gikalalis nga teritoryo diin halos tanang bahin niini giangkon sa China.
