CEBU CITY – Dismayado ang People’s Initiative for Federalism-Cebu Chapter sa nag-viral na video ni Communications Assistant Secretary Mocha Uson kauban ang social media personality nga si Andrew Olivar.
Sa pakighinabi sa Bombo Radyo kang Julito Roco, ang chairman sa People’s Initiative for Federalism-Cebu Chapter, gibutyag niini nga binastos ang pamaagi ni Uson ug Olivar sa pagpasabut sa publiko may labut sa pederalismo.
Matud ni Roco nga ang pederalismo usa ka seryoso nga kampanya sa gobyerbo ug dili angayan nga sagulan ug binastos.
Gihimug-atan niini nga daghang grupo, mga indibidwal ingun man ang mga magbabalaud ang naningkamut sa pagsulung sa pederalismo sa nasud hinungdan nga usa ka insulto nga susamang gihimung kataw-anan ni Uson ang nahisgutang kampanya.
Kahinumduman nga nakaangkun ug pagsaway sa social media ang video ni Asec Mocha ug ang kauban niini nga blogger gumikan sa ilahang pamaagi sa information drive may labut sa pederalismo nga binastos.
