CENTRAL VISAYAS- Nipakatap ang AFP-Visayas Command (AFP-Viscom) og kapin sa 2,933 ka mga personnel aron motabang sa pagpabilin sa kalinaw ug pagsiguro sa kaluwasan sa mga bisita nga motambong sa Sinulog festival sa dakbayan sa Sugbo.
Sa pakighinabi sa Bombo News team kang Lt. Col. Israel Galorio, ang tigpamaba Visayas Command, gitino niini nga ubos sa pagdumala ni Lt. General Fernando M. Reyeg, ang Commander sa AFP-Viscom, nga ang maong lakang aron masiguro ang hapsay ug malinawon nga pagsaulog sa Fiesta Señor ug uban pang aktibidad sa Sinulog Festival nga nagsugod niadtong Enero 9 ug molungtad pinaagi sa mga highlight o feature sa okasyon lakip na ang “Grand Parade ” sa Enero 19,2025.
Matod ni Galorio,nga ang 2,933 ka tropa naglakip sa 27 ka mga opisyal 234 Philippine Army personnel ug ang nahabilin pulos kadete gikan sa Reserve Officers Training Corps (ROTC) nga ipakatap usab atol sa usa ka semana nga kapistahan sa Nuestro Señor.
Gawas niini, ang Quick Reaction Force (QRF) idestino usab sa maong lugar ug ang Command Quick Operations Center gi-organisa ug gipalihok sa bantayan pag-ayo ang mga panghitabo sa pista ug pagsiguro nga dali nga pagtubag sa mga posible nga emerhensya.
Matod niini nga, nakig-alayon na sila sa PNP ug ubang ahensya sa gobyerno sa dakbayan aron mabantayan ang seguridad sa mga kalihukan nga ipahigayon nga naglakip sa Penitential Walk, Sinulog sa Kabataan sa Dakbayan, Fluvial, ug Solemn Prosesyon ingon man ang Sinulog Grand Parade karong Enero 19 sa Cebu City Sports Complex.
